ओखलढुंगा । सडकमा गुडिरहेको गाडीमा अचानक आगलगी हुँदा गाडी पूर्ण रुपमा जलेर नष्ट भएको छ । काठमाण्डौबाट चालक सहित ९ जना यात्रु बोकेर सोलुखुम्बु तर्फ जाँदै गरेको ना १ ज ८८८२ नम्बरको सुमो जीपमा आज (शुक्रबार) दिउँसो भन्डै २ बजेतिर मानेभञ्ज्याङ गाउँपालिका ७ स्थित हिलेपानी नजिकै सिद्धिचरण राजमार्गमा आगलागी भएको हो ।
सडकमा गुडिरहेको अवस्थामा ईन्जिन अत्याधिक रुपमा तातिएर वायरिङको तार सट् हुँदा आगलागी भएको पाईएको जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले जानकारी दिए । उनका अनुशार आगलागीको संकेत पाउने बित्तिकै जीपमा सवार यात्रु र उनिहरुको सामान निकालिएकोे हुनाले मानविय क्षति भने भएको छैन ।
गाडीमा लागेको आगो स्थानीय र प्रहरीको सहयोगमा नियन्त्रणमा लिईएको भएपनि गाडी पूर्ण रुपमा जलेको बताईएको छ । घटना बारे थप अनुसन्धान जारी रहेको जिल्ला प्रहरी कार्यालय ओखलढुंगाले जनाएको छ ।
तस्बीर सौजन्य :जिल्ला प्रहरी कार्यालय ओखलढुंगा
