ओखलढुंगा । जिल्लाको मानेभञ्ज्याङ गाउँपालिका ८ राघपुरमा आगलागी हुँदा २ घर र १ गोठ जलेर नष्ट भएका छन । विहिबार साँझ झन्डै ६ बजेतिर स्थानीय हर्कबहादुर राईको गोठबाट अचानक आगलागी सुरु भएको थियो ।
सोहि आगोले निजको गोठ सहित २ तले ढुंगामाटोले बनेको र अर्का स्थानीय टेकबहादुर राईको ढुंगामाटोले बनेको २ तले घर पूर्ण रुपमा जलेर नष्ट भएको हो ।
आगलागीमा परी घरमा राखिएको ३० हजार नगद सहित सुनचाँदी,अन्नपात, लत्ताकपडा समेत जलेर नष्ट हुँदा झन्डै १४ लाख रुपैयाँ बराबरको क्षति भएको जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले जानकारी दिए ।
आगलागी भएको झन्डै डेढ घण्टापछि स्थानीय र प्रहरीले आगो पूर्ण रुपमा नियन्त्रणमा लिएका थिए ।
आगलागीको बास्तविक कारण खुलेको छैन भने आगलागीबाट कुनै मानबिय तथा पशुचौपायामा क्षति नपुगेको जिल्ला प्रहरी कार्यालय ओखलढुंगाले जनाएको छ ।
