ओखलढुंगा । टिपर र स्कुटर एक आपसमा ठोकिँदा स्कुटरमा सवार चालक सहित २ जना घाईते भएका छन । जिल्लाको सिद्धिचरण नगरपालिका ११ स्थित रमाइलोडाँडाबाट रामपुर तर्फ जाँदै गरेको स्कुटर आज (बुधबार) दिउँसो ५ बजेतिर मोलुङ गाउँपालिका २ स्थित टेकानुपरमा बिपरित दिशाबाट आउँदै गरेको टिपर संग जुधेको थियो ।
बा ९७ प ७०८८ नम्बरको उक्त स्कुटर ना ७ क ८४४५ नम्बरको टिपरसंग जुध्दा दुर्घटना भएको हो । दुर्घटनामा परी स्कुटर चालक सिनपा ११ सोब्रुकी ३४ बर्षिया चन्दी राई र स्कुटरमा पछाडी सवार मोलुङ २ निबासी उनकी सासुआमा ६३ बर्षिया तिराशोभा राई घाईते भएकी छन । घाईते चालक राईको खुट्टामा चोट लागेको छ भने सासु तिराशोभाको टाउकोमा चोट लागेको प्रहरीले जनाएको छ ।
घाईते दुवै जनाको उद्धार गरी उपचारका लागि सामुदायिक अस्पताल सोब्रु पठाईएको छ भने टिपर चालक उदयपुरको कटारी नगरपालिका ३ हडियाका ३५ बर्षिय सुवास थापालाई प्रहरीले नियन्त्रणमा लिएको जिल्ला प्रहरी कार्यालय ओखलढुंगाका प्रहरी निरीक्षक विकास राईले जानकारी दिए ।
घटना बारे थप अनुसन्धान जारी रहेको जिल्ला प्रहरी कार्यालय ओखलढुंगाले जनाएको छ ।
