ओखलढुंगा । जिल्लाका विभिन्न स्थानमा छुटछुटै सवारी दुर्घटनामा परी ५ जना घाईते भएका छन । आज (सोमबार) जिल्लाका २ स्थानमा भएको सवारी दुर्घटनमा ५ जना घाईते भएका हुन । आज साँझ झन्डै ५ः३० बजेको समयमा सिद्विचरण राजमार्ग स्थित मानेभन्ज्याङ गाउँपालिका ५ बजार क्षेत्रमा ओखलढुंगाबाट काठमाण्डौ तर्फ जादै गरेको बा ०१०२६ च ०९३६ नम्बरको बोलेरो र बिपरित दिशाबाट आउंदै गरेको स ४ प ७९७४ नं को मोटरसाईकल एक आपसमा ठक्कर खाई दुर्घटना भएको थियो ।
दुर्घटनामा परी मोटरसाईकल चालक सिद्धिचरण नगरपालिका ११ का २३ बर्षिय संजिब श्रेष्ठ घाईते भएका छन । उनको दाहिने हातको कान्छि औलामा चोट लागेर स्थानिय मेडिकलमा उपचार भईरहेको जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले जानकारी दिए । घटना बारे थप अनुसन्धान भैरहेको प्रहरीले जनाएको छ ।
यता सिद्धिचरण नगरपालिका ११ मिलनचोकमा दुई वटा मोटरसाईल एकआपसमा जुध्दा २ वटा मोटरसाईकलमा सवार ४ जना घाईते भएका छन । आज (सोमबार) दिउँसो झन्डै ४ः३० बजे मिलनचोकबाट रमाईलोडाँडा तर्फ जादै गरेको बा ५४ प ७६९९ नम्बरको मोटरसाईकल र बिपरित दिशाबाट आउदै गरेको स ४ प २९६९ नम्बरको अर्काे मोटरसाईल एक आपसमा ठक्कर खाँदा दुर्घटना भएको हो ।
दुर्घटनामा घाईते हुनेमा मोटरसाईकल चालक ओखलढुङ्गाको सिनपा ३ का २३ बर्षिय भोजराज दाहाल र सोहि मोटरसाईकलमा पछाडी सवार सोही स्थानका ५३ बर्षिय फटप्रसाद दाहाल रहेका प्रहरीले जनाएको छ । त्यस्तै अर्का मोटरसाईकल चालक सिनपा ३ कै ४५ बर्षिय बलबहादुर तामाङ र सोहि मोटरसाईकल पछाडी सवार सोहि स्थानका ३८ बर्षिय कबिराज ओझा घाईते भएका हुन ।
घाईतेहरुको अनुहार, हातखुट्टा, नाक, मुख र शरिरका विभिन्न भागमा चोट लागेको प्रहरी निरीक्षक दासले जानकारी दिए । उनिहरुको अहिले सामुदायिक अस्पताल सोब्रुमा उपचार भैरहेको बताईएको छ । घटना बारे थप विवरण आउन बाँकी रहेको जिल्ला प्रहरी कार्यालय ओखलढुंगाले जनाएको छ ।
