ओखलढुंगा।ओखलढुंगाको मोलुङ गाउँपालिका वडा नं. ६ श्रीचौरमा एकघरमा आगलागी हुँदा १५ लाख बढीको क्षति भएकाे छ । आगलागी हुँदा मोलुङ गाउँपालिका वडा नं. ६ श्रीचौरका कर्मा शेर्पाको १५ महिने छोरा फुर्वा शेर्पा बेपत्ता भएका छन्। बुधबार दिउँसो २ बजेतिर घरमा कर्मा शेर्पाको श्रीमान श्रीमती दुवै जना घर नभएको बेलामा आगलागी भएको र आगलागीमा परि बालक बेपत्ता भएको जिल्ला प्रहरी कार्यालय ओखलढुङ्गाका प्रमुख प्रहरी नायव उपरिक्षक दिपक केसीले जानकारी दिए ।
जिल्ला प्रहरी प्रमुख केसीका अनुसार बाबुआमा घर नभएको बेला ३ बर्षिय मिङ्मार शेर्पाले आगो सल्काउन लाइटर खेलाउँदा आगलागी भएको आशंका गरिएको छ । आगलागी भएको बेला साना दुई बालकहरू मात्र घर रहेको र बेपत्ता भएका बालकको दाजुले भाइ भित्र नै भएको बताएकोले बालक आगोमा परेको आशङ्का गरिएको प्रहरी प्रमुख केसीले बताए ।
दिउँसो २ बजेतिर ढुङ्गामाटोले बनेको, ढुङ्गाको छानो भएको घरमा आगलागी भएको थियो । स्थानीयबासी, जनप्रतिनिधि तथा प्रहरीको पहलमा अपरान्ह साँढे ४ बजे आगलागीलाई नियन्त्रणमा लिएको प्रहरीले जनाएको छ । आगलागीका कारण दुई तले घर पूर्ण रुपमा नष्ट हुँदा १५ लाख बराबरको क्षति भएको तथा वेपत्ता बालकको खोजी भईरहेको जिल्ला प्रहरी कार्यालय ओखलढुङ्गाले जनाएको छ ।
