ओखलढुंगा । जिल्लाको मोलुङ गाउँपालिका ७ पात्लेमा आगलागी हँुदा १ घर जलेर नष्ट भएको छ । आज (बिहीबार) दिउँसो झन्डै १ बजे स्थानीय डानु भोटेको घरमा आगलागी भएको हो । खाना खाएर चुल्होको आगो ननिभाई उनिहरु मेलापातमा गएका थिए ।
सोहि क्रममा चुल्होको आगो सल्किँदै गएर उनको काठले बारेको चित्राको छानो भएको १ तले घर जलेर नष्ट भएको प्रहरीले जनाएको छ । आगलागीबाट घर र घरभित्र रहेको सम्पुर्ण सामानहरु, सोलार १ थान, १२ भोल्टको ब्याट्री १ थान १, लाभा कम्पनीको सादा मोबाइल १ थान समेत जलेर नष्ट हुँदा १ लाख ५० हजार रुपैयाँ बराबरको क्षति भएको जिल्ला प्रहरी कार्यालय ओखलढुंगाले जनाएको छ ।
आगलागी भएको अबस्थामा घरबाट सामान निकाल्ने क्रममा डानु भोटेको दुवै खुट्टाको पैतालामा सामान्य जलेको थियो । उक्त आगो स्थानीयबासी र नेपाल प्रहरीको सहयोगमा दिउँसो २ः५० बजेतिर पुर्ण रुपमा नियन्त्रणमा लिईएको जिल्ला प्रहरी कार्यालय ओखलढुंगाले जनाएको छ ।
