ओखलढुङ्गा । जिल्लाको चिशंखुगढी गाउँपालिकाको वडा नं. ३ खानिभञ्ज्याङमा निर्माण भएको नवनिर्मित प्रहरी चौकी भवन उद्घाटन गरिएको छ । नयाँ भवनको कोशी प्रदेश प्रहरी कार्यालय प्रमुख प्रहरी नायव महानिरीक्षक राजेशनाथ बास्तोलाले उद्घाटन गरेका हुन् ।
नयाँ भवनको उद्घाटन गर्दै प्रदेश प्रहरी प्रमुख बास्तोलाले पछिल्ला दिनमा सुरक्षा चुनौती बढ्दै गएको भन्दै नागरिकहरुको साथ र सहयोगले मात्र त्यसको हल हुन सक्ने बताए । कतिपय स्थानमा सुविधा सम्पन्न भवनको अभावमा प्रहरीले नागरिकहरुलाई सेवा दिन नसकेको भन्दै प्रदेश प्रहरी प्रमुख बास्तोलाले खानिभञ्ज्याङमा निर्माण भएको सुबिधा सम्पन्न भवनवाट भने सेवा प्रवाह गर्न सहज हुने बताए । मातहतका प्रहरीहरुलाई बास्तोलाले प्रहरीले प्रदान गर्ने सेवामा कुनैपनि किसिमको कम्प्लेन नआउने गरि काम गर्न निर्देशन समेत दिए ।
नवनिर्मित भवन २०७६ जेठ २८ गते पुष्पाञ्जली पिएसजेभी कम्पनी प्रालिले रु १ करोड ७९ लाख ९३ हजार २ सय ९७ रुपैयामा ठेक्का सम्झौता गरेको थियो । ठेक्का सम्झौता अनुसार कम्पनीले २०७८ साल माघ २५ गते निर्माण कार्य सम्पन्न गरेको थियो । भवन निर्माण कार्य सम्पन्न भएको डेढ बर्षसम्म पनि सम्बन्धित निकायलाई औपचारीक रुपमा उद्घाटन गरि हस्तान्तरण गरिएको थिएन ।
