ओखलढुंगा । रुखको हाँगाले लागेर एक जना गम्भीर घाईते भएका छन । जिल्लाको सिद्धिचरण नगरपालिका ९ ज्यामिरेका ५० बर्षिय लेखबहादुर बानियाँ गम्भीर घाईते भएका हुन ।
आज (मंगलबार) विहान स्थानीय खहरे दोभानमा छिमेकीको मरिमराउमा दाहसंस्कारको लागि उनि उतिसको रुख काट्न गएका थिए । रुख लडाउने क्रममा उतिसको हाँगाले उनलाई लागेको थियो । हाँगाले लागेर गम्भीर घाईते भएका उनलाई तत्काल उद्धार गरी उपचारको लागि सामुदायिक मिसन अस्पताल सोब्रु ल्याईएको बताईएको छ ।
अस्पतालमा सामान्य उपचार पश्चात रेफर भई थप उपचारका लागि हेलिकोप्टर मार्फत काठमाडौं लैजाने तयारी (समाचार तयार पार्दा सम्म) भईरहेको प्रहरीले जनाएको छ । निज घाइतेको बायाँ हात, दाहिने पट्टिको कन्चटमा चोट लागी निजको अवस्था हाल गम्भिर रहेको जिल्ला प्रहरी कार्यालय ओखलढुंगाले जनाएको छ ।
