ओखलढुंगा । जिल्लाको सिद्धिचरण नगरपालिका–५ सानिटारका अन्दाजी ५२ वर्षीय एकराज मग्रातीको लडेर मृत्यु भएको छ । मग्राती आज (बिहीवार) दिउँसो करिब १ बजे बर्णालुबाट मासु बोकी घरतर्फ फर्कने क्रममा घर नजिकैको गोरेटो बाटोमा लडेका थिए। सोही क्रममा उनी मृत अवस्थामा फेला परेका प्रहरीले जनाएको छ।
उनी मृत अवस्थामा रहेको खबर दिउँसो साढे १ बजे रुम्जाटारस्थित बिमानस्थल सुरक्षा गार्डमा पुगेको थियो। खबर पाएलगत्तै त्यहाबाट प्रहरी टोली खटिएको र घटनास्थललाई सुरक्षित गरिएको थियो।
पछि आवश्यक अनुसन्धान तथा कानुनी प्रक्रियाका लागि जिल्ला प्रहरी कार्यालय ओखलढुंगाबाट प्रहरी निरीक्षकको कमाण्डमा अर्को टोली खटिएको थियो । प्रहरी टोलीले आवश्यक कानुनी प्रक्रिया पूरा गरी शवलाई पोष्टमार्टमका लागि जिल्ला अस्पताल रुम्जाटार पठाइएको जिल्ला प्रहरी कार्यालय ओखलढुंगाका प्रहरी निरीक्षक विजय कार्कीले जानकारी दिए।
