ओखलढुंगा । बोलेरो दुर्घटना हुँदा चालक सहित ५ जना घाईते भएका छन । आज (मंगलबार) दिउँसो ३ः५० बजेतिर जिल्लाको मानेभञ्ज्याङ गाउँपालिका ३ सल्ले स्थित भित्री सडक खण्डमा दुर्घटना हुँदा ५ जना घाईते भएका हुन ।
केत्तुकेबाट घ्याती तर्फ जाँदै गरेको ग ३ च ८१३५ नम्बरको बोलेरो सडकमा गुडिरहेको अवस्थामा अचानक फेल भई दुर्घटना भएको बताईएको छ । दुर्घटनामा घाईते हुनेमा २९ बर्षिय चालक अबिन राई, ३१ बर्षिया बडासरी राई, २५ बर्षिया निर्मासरी राई, ५१ बर्षिया गोर्सीमायाँ राई र ४६ बर्षिया मसलमायाँ राई रहेका छन ।
घाईतेहरु सबै सोही स्थानका रहेको प्रहरीले जानकारी दिएको छ । घाईतेहरुको तत्काल उद्धार गरी उपचारका लागि सामुदायिक अस्पताल सोब्रु पठाईएको जिल्ला प्रहरी कार्यालय ओखलढुंगाका प्रहरी निरीक्षक बलिष्टर सिंहले जानकारी दिए ।
घाईतेहरुको टाउको, छाती, आँखाको डिल, हात लगायत शरिरका विभिन्न ठाउँमा चोट लागेको उनले बताए । घटना बारे थप विवरण आउन बाँकी रहेको जिल्ला प्रहरी कार्यालय ओखलढुंगाले जनाएको छ ।
