ओखलढुंगा । चर्चित नेपाली पप गायक राजु लामा आवद्ध राजु लामा फाउन्डेसनले ओखलढुंगामा वृक्षरोपण गरेको छ । जिल्लाको सुनकोशी गाउँपालिकामा विभिन्न प्रजातिको फलफूल तथा वनस्पतिको बिरुवा वितरण सहित वृक्षरोपण गरिएको हो ।
गायक राजु लामा स्वयमको उपस्थितिमा आज पालिका तथा पालिकाबासीलाई फलफूल तथा वनस्पतिको बिरुवा वितरण गरि वृक्षरोपण समेत गरिएको छ । गाउँपालिकाको समन्वयमा फाउन्डेसनद्धारा ११ प्रजातीका ५ हजार विरुवा पालिकाबासीमा वितरण तथा रोपण गरिएको गाउँपालिकाले जनाएको छ । सुन्तला, लिची, एभोकार्डो, किवि, कागती, दन्ते ओखर, आँप लगायत पालिकाका प्रत्येक वडामा ५ सयका दरले भौगोलिक अवस्था अनुशार वितरण गरिएको छ ।
गायक लामाकै हातबाट विरुवा रोपेर कार्यक्रमको उद्घाटन गरिएको थियो । कार्यक्रममा गायक लामालाई बाजागाजा सहित भव्य स्वागत तथा सम्मान गरिएको थियो । राजु लामा फाउन्डेसनले जलवायु परिवर्तनको असरलाई न्युनिकरण गर्न मुलुकका विभिन्न स्थानमा वृक्षरोपण लगायतका अभियान संचालन गर्दै आएको छ ।
