ओखलढुंगा । जिल्लामा यस वर्ष धान उत्पादनमा बृद्धि भएको छ । जिल्ला कृषी ज्ञान केन्द्र ओखलढुंगाका अनुशार गत वर्षको तुलनामा झन्डै ७ सय ६० मेट्रिकटन धान उत्पादन बढेको हो ।
जिल्लाको ३ हजार ८ सय ३ हेक्टर क्षेत्रफलमा धान उत्पादन हुँदै आएको छ । गत वर्ष ९ हजार ५ सय ८ मेट्रिकटन धान उत्पादन भएकोमा यस वर्ष १० हजार २ सय ६८.१० मेट्रिकटन धान उत्पादन भएको छ ।
यस वर्ष अनुकुल मौसम, पर्याप्त सिंचाई र रोग किराको कमीजस्ता कारणले उत्पादनमा बृद्धि भएको ज्ञान केन्द्रका निमित्त प्रमुख टिकाराम बानियाँले बताए। यस वर्ष जिल्लामा धान उत्पादनको उत्पादकत्व प्रतिहेक्टर २ दशमलब ७ मेट्रिकटन रहेको छ ।
वर्षमा एकपटक मात्रै धान उत्पादन हुने ओखलढुंगामा कृषकले मकवानपुर १ र खुमल ४ जस्ता उन्नत र अटे तथा जर्नेलीजस्ता स्थानीय जातका धानखेती गर्दै आएका छन । जिल्लाका सिल्खुबेसी, सेराबेसी, जरायोटार, बलखु, सेर्नाबेसी, टोक्सेल, टारकेराबारी र सेराफाँटलगायतका क्षेत्र धान उत्पादन हुने मुख्य क्षेत्र मानिन्छ ।
