ओखलढुंगा । आधारभुत तहको शैक्षिक गुणस्तर बृद्धिका लागि ओखलढुंगामा १ दिने अन्तरक्रिया तथा कार्यशाला गोष्ठी सञ्चालन गरिएको छ । कक्षा १ देखी ५ सम्मका प्रधानाध्यापकहरु संग आज (शुक्रबार) अन्तरक्रिया गरिएको हो ।
जिल्ला शिक्षा समिती ओखलढुंगाको आयोजना र शिक्षा विकास तथा समन्वय ईकाई ओखलढुंगाको ब्यवस्थापन तथा समन्वयमा कार्यक्रम सम्पन्न भएको थियो । कार्यक्रममा जिल्ला स्थित विभिन्न विद्यालयका शिक्षक शिक्षिकाहरुले आधारभूत तहको संस्थागत तथा सामुदायिक विद्यालयको पाठ्यपुस्तक, पाठ्यक्रम तथा पाठ्य सामग्री बारे खोजमुलक सामग्री प्रस्तुत गरेका थिए । सामुदायिक विद्यालयको तुलनामा संस्थागत विद्यालयको पाठ्यपुस्तक आर्कषक र महंगो देखिएको उनिहरुको भनाई थियो ।
आधारभुत तहको शैक्षिक गुणस्तर सुधारका लागि कक्षाकोठा ब्यवस्थापन देखी लिएर पाठ्यपुस्तक छपाईमा समेत विशेष ध्यान दिन आवश्यक रहेको उनिहरुले बताए । त्यस्तै प्रारम्भीक बालविकास तहलाई व्यवस्थित गर्ने र विद्यालयमा शैक्षिक गुणस्तर बृद्धिका लागि बाधक बनेका विषयमाथी बृहत छफफल तथा बहस गरेर निष्कर्ष निकालिनुपर्ने उनिहरुले बताए । प्रयोगात्मक शिक्षामा जोड दिन सकिए सिकाईमा थप सहज हुने उनिहरुको भनाई थियो ।
जिल्ला समन्वय समितीका प्रमुख टेकराज भट्राईको अध्यक्षता र कोशी प्र्रदेश सांसद प्रदिप सुनुवारको प्रमुख आतिथ्यतामा कार्यक्रम सम्पन्न थियो ।
