ओखलढुंगा । जिल्लाको सिद्धिचरण नगरपालिका ४ रुम्जाटारमा यातायात ब्यवस्था कार्यालय स्थापना भएको करिब ५ वर्ष बित्यो । विशेष गरी माथिल्लो सगरमाथाका ३ जिल्ला ओखलढुंगा, खोटाङ र सोलुखुम्बुका लागि स्थापना भएको यो कार्यालयले हालसम्म २८ हजार भन्दा बढीलाई सेवा दिईसकेको छ । कोशी प्रदेश सरकारको भौतिक पुर्वाधार विकास मन्त्रालय अन्तर्रगत स्थापना भएको यस कार्यालय पछिल्लो समय एकाएक अन्तै सार्न लागिएको भन्दै स्थानीय आन्दोलित बनेका छन ।
कोशी प्रदेश सरकारको भौतिक पूर्वाधार मन्त्रलायले २०७७ सालमा ओखलढुंगाको रुम्जाटारमा यातायात ब्यवस्था कार्यालय स्थापना गरेको थियो । त्यस यता यस कार्यालयबाट ब्लु बुक नविकरण, सवारी दर्ता, नामसारी, रुट ईजाजत पत्र र झन्डै २ वर्ष अघिबाट सवारी सालक अनुमनीपत्र वितरणको काम समेत हुँदै आएको छ । तर रुम्जाटारमा स्थापना भएको यातायात ब्यवस्था कार्यालय हाल आएर अन्तै सार्न लागिएको भन्दै स्थानीय आन्दोलित बनेका छन ।
प्रदेश सरकारले जिल्लाकै मानेभञ्ज्याङ गाउँपालिका ७ हर्कपुरमा कार्यालय सार्न लागिएको भन्दै स्थानीय आक्रोशित बनेका हुन । करिब ५ वर्षदेखि सेवा प्रवाह गरिरहेको कार्यालयलाई रहस्यमय तरिकाले स्वार्थ समूहलाई फाइदा पुग्ने गरी सार्न खोजिएको स्थानीयको आरोप छ । एउटा सरकारले गरेको निर्णय अर्को सरकारले शक्तिको आड र विभिन्न वाहनामा परिवर्तण गर्न खोजिएको र नागरिकलाई सुविधाबाट विमुख बनाउन खोजिएपछि यातायात कार्यालयलाई यथावत रुपमा स्थापना गर्नका निम्ती आफुहरु आन्दोलित भएको स्थानीय प्रकाश कट्वालले बताए ।
गत पुस १२ गते मन्त्रीस्तरीय निर्णय भन्दै रुम्जाटार कार्यालयलाई अस्थायी रुट इजाजतपत्रका लागि त्यस कार्यालयको कार्यक्षेत्रभित्र पर्ने जिल्लाकै हर्कपुरमा आवश्यक व्यवस्थापन गर्न भन्दै पत्र पठायो । पुनह पुस २१ मै अर्को पत्र लेखेर हर्कपुरबाट इजाजत पत्र र ब्लुबुक नवीकरणसम्बन्धी कार्य सुरु गर्न र सवारी दर्ता, नामसारीका कार्यहरू क्रमशः गर्दै जाने गरी व्यवस्था मिलाउन भनिएको छ । सेवा दिइरहेको यातायात कार्यालय हटाएर अपायक क्षेत्रमा सेवा केन्द्रका रुपमा राख्ने र विस्तारै कार्यालय नै हटाउने समेतको तयारी भएपछि जिल्लाबासी आन्दोलनमा उत्रिएका हुन ।
भैरहेको कार्यालय एकाएक अन्तै सार्न खोजिनु जिल्लाबासी र सेवाग्राही प्रति अन्याय गर्न खोजिएको सिद्धिचरण नगरपालिका ४ का वडा अध्यक्ष रत्नबहादुर गुरङले बताए । जिल्ला सदरमुकामबाट झन्डै ११ किलोमिटरको दुरीमा रहेको यातायात कार्यालय आफ्नै भवन नहुँदा हाल भाडाको घरबाट सञ्चालन भैरहेको छ । भवन निर्माणका लागि स्थानीयले निशुल्क रुपमा झन्डै ३ रोपनी भन्दाबढी जग्गा पनि उपलब्ध गराईसकेका छन । तर जग्गा उपलब्ध गराए पनि प्रदेश सरकारले पास गर्न सहमति नदिईरहेको र कार्यालय नै अन्तै सार्न खोजिएकोले रुम्जाटारमै स्थाई रुपमा कार्यालय यथावत नरहेसम्म आन्दोलन जारी राख्ने स्थानीयको भनाई छ ।
कांग्रेस र एमाले पार्टी कार्यालयमा तालाबन्दी
नारा जुलुस सहित सदरमुकाम आएका स्थानीयले आज (सोमबार) नेपाली कांग्रेस र नेकपा एमालेको जिल्ला पार्टी कार्यालयमा तालाबन्दी गरेका छन । नेकपा एमालेको जिल्ला कमिटी बैठकको तयारीका लागि छलफल भैरहेको बेला आक्रोशित समुहले ज्ञापनपत्र बुझाउँदै तालाबन्दी समेत गरेको हुन ।
कोशी प्रदेश सरकार एमाले र कांग्रेस नेतृत्वकै रहेकाले रुम्जाटारबाट यातायात कार्यालय सार्न खोजिएको भन्दै पार्टी कार्यालयहरुमा तालाबन्दी गरिएको आन्दोलनका अगुवा विवेक तामाङले बताए । एमाले पार्टीमा ताला लगाएपछि केहि नेताहरु कार्यालयमै थुनिएका थिए ।
पार्टी कार्यालयमा तालाबन्दी गरिएपछि दुवै पार्टीका प्रतिनिधीहरुले आन्दोलनरत पक्षको माग सम्बोधन गर्न प्रदेश सरकार समक्ष समन्वय गरिने आश्वसन दिएका छन । यातायात कार्यालय रुम्जाटारमै यथावत राख्न आफुहरुको सक्दो पहल हुने उनिहरुको भनाई छ ।
