ओखलढुंगा । कोशी प्रदेश सरकारले केहि साता अघि जारी गरेको प्रदेश जीवनाशक विषादी ब्यवस्थापन ऐन २०८१ बारे जिल्लाका सरोकारवालाहरुलाई जानकारी गराईएको छ । कृषी ज्ञान केन्द्र ओखलढुंगाले आज (बिहीबार) जिल्ला स्थित एग्रोभेट संचालक तथा विभिन्न स्थानीय तहमा कार्यरत कृषी प्राविधिकहरु संग अन्तरक्रिया गोष्ठीको आयोजना गर्दै यस बारे जानकारी गराएको हो ।
कार्यक्रममा ऐन बारे जानकारी गराउँदै कृषि ज्ञान केन्द्र ओखलढुंगाका निमित्त प्रमुख टिकाराम बानियाँले प्रदेशमा जीवनाशक विषादीको बिक्री वितरण, भण्डारण,ब्याबसायिक प्रयोग र छर्कने कार्यलाई ब्यवस्थापन तथा नियमन गरि मानव तथा जिवजन्तुको स्वास्थ्य र बातावरणमा पर्ने प्रतिकुल प्रभावलाई नियन्त्रण गर्न यो ऐन जारी गरिएको बताए । उनले प्रदेश जीवनाशक विषादीे ब्यवस्थापन समिति, बैठक, समितिको काम कर्तब्य र अधिकार, प्रयोगशाला, ईजाजत पत्र, योग्यता सम्बन्धी ब्यवस्था,ईजाजत पत्रको नविकरण, खारेजी, प्रतिलिपी, विषादी ब्यवस्थापन सम्बन्धी ब्यवस्था,प्रयोगशालाको काम, कर्तब्य र अधिकार आदी बारे जानकारी गराएका थिए ।
त्यस्तै जीवनाशक विषादीको प्रयोग, भण्डारण, बिक्री वितरण र ब्यवस्थापन, कसुर तथा सजाय, जरिवाना, क्षतिपूर्ती सम्बन्धी ब्यवस्था आदी बारे पनि प्रष्ट पारेका थिए । विषादी बचाउँने चिज नभएर नष्ट गर्ने चिज भएकाले ऐन,कानुन र परिधिमा रहेर मात्र यसको विक्रीवितरण तथा प्रयोग गर्न जिल्ला स्थित एग्रोभेट संचालकहरुलाई उनले आग्रह गरे । सुचिकृत तथा पञ्जीकरण नभएका विषादी विक्रीवितरण नगर्न आग्रह गर्दै निमित्त प्रमुख बानियाँले ईजाजत पत्र नविकरण पनि समयमै गर्न अनुरोध गरे ।
कार्यक्रममा उपस्थित एग्रोभेट सञ्चालकहरुले विषादी बिक्रीवितरण गर्दा विभिन्न समयमा आईपरेका समस्या र अनुभव आदानप्रदान गरेका थिए । जिल्ला स्थित ईजाजत पत्र नलिएका र कतिपय किराना पसलहरुबाट समेत विभिन्न खाले विषादी बिक्रीविरण भैरहेकाले यसको आवश्यक अनुगमन गरि नियमन गरिनुपर्ने उनिहरुको सुझाब थियो ।
कार्यक्रममा प्रधानमन्त्री कृषी आधुनिकिकरण परियोजना, परियोजना कार्यान्वयन ईकाई ओखलढुंगाका निमित्त प्रमुख हेम आलेमगर, भेटेरिनरी अस्पताल तथा पशुसेवा बिज्ञ केन्द्र ओखलढुंगाका प्रमुख गणेश भट्टराई लगायतको उपस्थिती रहेको थियो ।
