पुष २८, ओखलढुङ्गा । सोलुखुम्बुबाट ओखलढुङ्गा तर्फ आउदै गरेको जिप दुर्घटनामा परेको छ । सोलुखुम्बुको नेचासल्यान गाउँपालिकाबाट ओखलढुङ्गा तर्फ आउदै गरेको प्र–१–०२–००२ च ३८३५ नम्बरको बोलेरो जीप सिद्धिचरण नगरपालिका वडा नं. ५ विप्ल्याटेमा दुर्घटनामा परेको हो ।
बोलेरो जीप दुर्घटना हुदा बोलेरोमा सवार चालक सहित सात जना घाईते भएका छन् । घाईते मध्ये नेचा सल्यान गाउँपालिका वडा नं. ३ का ७० वर्षिय डिल्लीराम शर्माको अवस्था गम्भिर रहेको जिल्ला प्रहरी कार्यालय ओखलढुङ्गाका प्रहरी निरिक्षक देबेन्द्र दासले बताए ।
घाइतेहरु सबैजना नेचा सल्यान गाउँपालिकाका रहेका छन् । अन्य घाइते हुनेहरुमा बर्ष १२ का श्वरव बास्तोला, बर्ष १२ कै भिष्म फुयाल, बर्ष ३६ कि यसोदा बास्तोला, बर्ष ४० कि सिता कुमारी शर्मा, बर्ष २१ का सुनिष तामाङ, बर्ष ३२ का चालक सौराज राइ रहेका छन् ।
प्रहरी निरीक्षक दासका अनुसार विहिबार विहान ९:४० बजे सिद्धिचरण नगरपालिका–५ विब्ल्याटेमा ब्रेक फेल भएर बोलेरो जिप दुर्घटना भएको हो । दुर्घटनामा परि घाईते भएका सबैजनाको उद्दार गरि ओखलढुङ्गा सामुदायिक अस्पतालमा सोब्रुमा ल्याइएको छ । उनीहरु सबैको उपचार सामुदायिक अस्पतालमा नै उपचार भईरहेकोे प्रहरी निरीक्षक दासले जानकारी दिए ।
दुर्घटनामा परि घाईते भएका हरु मध्ये शर्मा बाहेक अरु सबैको अबस्था सामान्य रहेको प्रहरीले जनाएको छ । ब्रेक फेल भएपछि चालकले बोलेरो जिपलाई भित्तामा ठोक्काएको अनुमान गरिएको छ । यद्यपी दुर्घटनाको थप कारण बारे अनुसन्धान भईरहेको पनि जिल्ला प्रहरी कार्यालय ओखलढुङ्गाले जनाएको छ ।
